Salyan rayonunda şagird məktəbdə döyülüb.
BUTA.TV Oxu.az-a istinadən xəbər verir ki, rayonun 2 saylı tam məktəbində təhsil alan iki şagird birlikdə digər sinif yoldaşını döyüb.
Uşaq Salyan Rayon Mərkəzi Xəstəxanasının reanimasiya şöbəsinə yerləşdirilib.
Bildirilib ki, onlar uşağı dəmir beşbarmaqla döyüblər.
İddia edilib ki, hadisəni törədən şəxslərin valideynləri - iş adamı və bank işçisi olduqları üçün ailəyə polisə müraciət etməmək üçün təzyiq olunub.
Daxili İşlər Nazirliyinin (DİN) Mətbuat Xidmətinin bölmə rəisi Zeyni Hüseynov bildirib ki, Salyan Rayon Polis Şöbəsinə rayondakı məktəblərin birində şagirdin xəsarətlər alması ilə bağlı rayon mərkəzi xəstəxanasına müraciət etməsi barədə məlumat daxil olub:
“Daxil olan məlumatla əlaqədar Salyan RPŞ-nin İstintaq Bölməsində müvafiq araşdırmalara başlanılıb. Araşdırmalar zamanı məlum olub ki, məktəbli sinif yoldaşları ilə futbol oynayan zaman digər şagirdlə aralarında mübahisə yaranıb.
Material üzrə müvafiq ekspertiza təyin olunub və valideynlərinin iştirakı ilə məktəblilərin izahatları alınıb.
Ekspertizanın rəyindən və aparılan araşdırmaların nəticəsindən asılı olaraq məsələyə hüquqi qiymət veriləcək”.
Şirvan-Salyan Regional Təhsil İdarəsinin nümayəndəsi Gülay Qanbayzadə bildirib ki, artıq məsələ barədə məlumatlıdırlar:
“İdarə tərəfindən də məsələ barədə araşdırma aparılır”.
Tibbi Ərazi Bölmələrini İdarəetmə Birliyindən (TƏBİB) bildirilib ki, 2008-ci il təvəllüdlü N.Tağızadə TƏBİB-in tabeliyindəki Salyan Rayon Mərkəzi Xəstəxanasının Təcili tibbi yardım şöbəsinə daxil olub:
“Ona burun nahiyəsinin küt travması, qapalı kəllə-beyin travması diaqnozu qoyulub, Reanimasiya şöbəsinə yerləşdirilib. Hazırda tibb müəssisəsinin Cərrahiyyə şöbəsində müalicəsi davam etdirilir. Vəziyyəti stabildir”.
- Azərbaycanda terror törətmək istəyən əcnəbiyə hökm oxundu
- Təyyarədə adam öldü, məcburi Bakıya endi
- Şahrux Xandan azərbaycanlılara jest - Video
- İğdır-Naxçıvan kəmərinin tikintisi tamamlanmaq üzrədir
- Xaçmaz İH Nadir Xudiyevlə 1,3 milyona anlaşdı
- Urmiya gölü yenidən qurumağa başladı
- Azərbaycan-Türkiyə qardaşlığı zirvələri fəth edəcək - MM sədri
- Azərbaycanla ticarət dövriyyəsi 15 milyarda çatdırılır - Səfir