ABŞ Prezidenti Donald Tramp çoxsaylı təkliflərinə birini də əlavə edib. O, Rusiya və Çinə hərbi büdcələrini 50 faiz azaltmağı təklif edib. Ağ Ev sahibi bununla bağlı beynəlxalq konfrans keçirməyə hazır olduğunu bildirib.

BUTA.TV xəbər verir ki, bu sözləri politoloq Elxan Şahinoğlu qeyd edib.

O bildirib ki, Tramp Moskva və Pekinə hərbi arsenallarını azaltmağı da təklif edib:

“Donald Trampın sözlərinə görə, Rusiya Prezidenti Vladimir Putin və Çin lideri Si Szinpin onun bu təklifini bəyəniblər. Halbuki Putin və Szinpin Trampın təklifini bəyəndiyinə dair açıqlama verməyiblər. Bu, indiki şərtlər altında mümkün də deyil. Əksinə, Rusiya və Çin hərbi büdcələrini ildən-ilə artırırlar. Rusiya Ukraynaya qarşı işğalçı müharibəyə görə hərbi xərclərini daha da artırıb, hərbi-sənaye kompleksinə yeni sifarişlər verib, Çin isə Hind və Sakit okean bölgəsində hərbi gəmilərinin sayını artırıb.

Putin və Szinpin yalnız o şərtlə Trampın təklifin qəbul edə bilərlər ki, ABŞ-la yanaşı, Vaşinqtonun müttəfiqləri də hərbi büdcələrini azaltsınlar.

Digər tərəfdən ABŞ tərəfdaşları olan Hindistan, Avstraliya və Yaponiya ilə birgə QUAD təşkilatını gücləndirib. Bu təşkilat çərçivəsində 4 ölkə arasında hərbi əməkdaşlıq genişlənib, bölgədə birgə hərbi təlimlər keçirilir. Pekin QUAD təşkilatını Çin üçün təhlükə kimi qiymətləndirir. Aydındır ki, Pekin Vaşinqtondan QUAD təşkilatının buraxılmasını tələb etsə, Donald Tramp Çin hakimiyyətinin bu istəyini yerinə yetirməyəcək. Misal üçün bir neçə gün əvvəl Çinin qırıcı təyyarələri Cənubi Çin dənizinin hava sahəsində Avstraliyanın təyyarəsinə yaxın məsafədə uçuşlar həyata keçirib. Avstraliyanın müdafiə naziri Riçard Marles mövcud vəziyyətdən narahatlığını bildirib. Çin Xarici İşlər Nazirliyi isə əksinə, Avstraliya təyyarəsini Çinin hava məkanına “qəsdən müdaxilə etməkdə” və milli təhlükəsizliyini “təhdiddə” ittiham edib. Belə vəziyyətdə Çinin hərbi büdcəsini azaldacağını gözləmək mümkün deyil”.

Politoloq xatırladıb ki, Tramp telefonla Vladimir Putin və Si Szinpinlə ayrılıqda danışsa da, Moskva və Pekinin Ağ Ev sahibinə etibarı yoxdur:

“Təsadüfi deyil ki, Rusiya Senatının üzvü, Kremlə yaxınlığı ilə bilinən Aleksey Puşkov Donald Trampın Rusiya ilə Çin arasında ittifaqı pozmağa çalışdığını bildirib. Puşkov bunu ona görə deyib ki, Tramp Rusiyanı “Böyük səkkizliy”in (G8) sırasına qaytarmaq istəyir. Tramp həqiqətən vaxtilə Rusiyanın “Böyük səkkizlik” dən çıxarılmasını səhv qərar adlandırıb. Həmin qrupda Çin yoxdur. Buna görə də Puşkov hesab edir ki, Tramp Rusiyanı Çindən uzaqlaşdırmaq istəyir. Məntiq ondan ibarətdir ki, Rusiya-Çin ittifaqı həqiqətən ABŞ üçün təhlükə mənbəyidir. Vaşinqton bunlardan birini mümkün qədər öz tərəfinə çəkməyə çalışmalıdır. Donald Tramp Rusiyanı seçib. Onun rəqibi Çindir”.

• Vens Münhendə Avropa elitasını bu çıxışla darmadağın etdi
• Azərbaycan-Somali əlaqələri intensivləşir - Deputat
• Ermənistan Zəngəzur dəhlizini açmağa hazırdır - Erməni KİV
• Trampın Rusiya və Çinə sensasion tələbi
• Ukrayna savaşında Avropa zərbə aldı: qazanan isə odur!
• İrəvan Bakıdan 4 dəfə çox ballistik raketi necə əldə edib?
• Rusiya Cənubi Qafqaza qayıdır? – Bakı razı olsa...
• 170 azərbaycanlı işgəncələrlə öldürüldü